សាកលវិទ្យាល័យ អាស៊ី អឺរ៉ុប សាលាហេងស៊យ !!!

សិស្សណា​ហេង​មិនដឹងទេ តែសិស្ស​ដូចខ្ញុំ​ បែរជា «ស៊យ» តាំងពីចុះឈ្មោះរៀន​ នៅ សាកលវិទ្យាល័យ អាស៊ី អឺរ៉ុប បន្តឆ្នាំទី២ ​បរិញ្ញាបត្រ ភាសាអង់គ្លេស។ រហូតដល់ ​ប្រលងបញ្ចប់ឆ្នាំទី៤ ក៏នៅតែ ស៊យ ព្រោះ បាន​ចំណាយ​ពេលវេលា រង់ចាំ អស់ជិត​ ៦ឆ្នាំ ទម្រាំ បាន ទទួល​បរិញ្ញាបត្រ​ ឯកទេស ភាសាអង់គ្លេស មកក្នុងដៃ នៅថ្ងៃនេះ។ តាមពិត ខ្ញុំ​ប្រលង​ ​បញ្ចប់​​បរិញ្ញាបត្រ​តាំងពី​ឆ្នាំ​២០១១ សិស្ស​រួមជំនាន់​ភាគច្រើន បាន​​ទទួលសញ្ញាបត្រ ហើយថតរូប ជាមួយគ្នា កាលពីថ្ងៃទី​២៩ ខែតុលា ឆ្នាំ២០១២។

ព្រោះតែ ខ្ញុំប្រើ សញ្ញាបត្រ​​ឆ្នាំមូលដ្ឋាន ​ចុះឈ្មោះចូលឆ្នាំទី២ ខ្ជិលរៀន​ឆ្នាំមូលដ្ឋាន ឡើងវិញ ហើយ​​ប្តូរវេន​សិក្សាពី​ចុងសប្តាហ៍ មក​ច័ន្ទ ដល់ សុក្រ ទើប​ធ្វើអោយ សាលា​ ចល័ត ឬគ្រវ៉ាត់ចោល​ ឯកសារ​​កាល​ប្រវត្តិសិក្សា​​របស់ខ្ញុំ រប៉ាត់រប៉ាយ ហើយ​បែរយក​ជា លេស​មួយ​សម្រាប់​​ សាលា​ បន្ទោស​ខ្ញុំ​ ដោយ​គ្មានការ​ទទួលខុសត្រូវ​ថា ខ្ញុំ​ខ្វះ​សញ្ញាបត្រ​​ឆ្នាំមូលដ្ឋាន ខ្វះ​សញ្ញាបត្រ​​បាក់ឌុប (បើខ្វះ​ចឹង​ស្មាន​តែ​អនុញ្ញាត​អោយ​ខ្ញុំចុះ​ឈ្មោះ​រៀនឆ្នាំទីពីរ ? ពេល​ចុះឈ្មោះ​​ចូលរៀន​អោយ​ម្តងហើយ ពេល​ចុះឈ្មោះ​​ប្រល​ង​អោយ​ម្តងទៀត ពេល​ប្រលង​រួច​ហើយ​មកទារ​ម្តងទៀត ពេលបាត់​ឈ្មោះ ទា​រម្តងទៀត) ខ្វះ​រូបថត (ខ្ញុំ​យក​ទៅ​អោយជិត​២០សន្លឹក ហើយ ព្រោះអោយ​ម្តង ​៤សន្លឹក មិនដឹង​យកទៅធ្វើស្អី ???) … ខ្ញុំត្រូវយឺតទទួលសញ្ញាបត្រ​មួយជុំ។

ពេល​ជុំក្រោយ​មកដល់ រង់ចាំដល់គេ ស្រង់​ឈ្មោះ​អីណា ម្តងជាច្រើនដង… សរុបមក ខ្ញុំតាម​​យក​សញ្ញាបត្រ​មួយនេះ មិនតិចជាង ២០លើកឡើយ ទម្រាំ​តែបាន​ជួប​ឈ្មោះ​ខ្លួនឯង។ ថ្ងៃចុងក្រោយ នៅ​តែស៊យ ទៅ​ដកសញ្ញាបត្រ​​ថ្ងៃទី​២៦ មិថុនា ២០១៤នេះ សាកល​វិទ្យាល័យ ទាលុយ ៥ដុល្លា ជាថ្លៃ​ដក​សញ្ញាបត្រ​ ហើយ រឹតតែស៊យ សញ្ញាបត្រ បរិញ្ញាបត្រ​ ឯកទេសភាសា​អង់គ្លេស នៅ​តែខុស​​ថ្ងៃខែឆ្នាំកំណើត។ ខ្ញុំ​ខលសួរ មិត្ត​ភក្តិរួម​ថ្នាក់ អំពី សញ្ញាបត្រ​​ខុស​ថ្ងៃខែឆ្នាំកំណើត​របស់ខ្ញុំ… មិត្តម្នាក់នោះ​ផ្តល់យោបល់​ថា ដក​មក​អោយ​ផុតកម្ម​ពៀរ​ជាមួយវាទៅ ធុញ​ណាស់…។

ដើមរឿងខុសឆ្នាំកំណើត ទំនងជា ខុសតាំងពីពេល ​សាលា​​ចេញ​កាត​និស្សិត ក្នុងឆ្នាំទី៤ ពេលនោះ ខ្ញុំ​បានប្តឹង​​រឿងខុសឆ្នាំ​កំណើត តាំង​ពីធ្វើកាត​សិស្ស តែ​​មន្រ្តីរដ្ឋបាលថា មិនអីទេ… ពេលបំពេញ​ពាក្យ​​​ធ្វើសញ្ញាបត្រ និងប្រលង ខ្ញុំបាន​​បញ្ជាក់​ពី ឆ្នាំកំណើត​ឡើងវិញ ហើយ មន្រ្តី​សាលា​ប្រាប់ថា សញ្ញាបត្រ គេយក​តាម​​ពាក្យ​សុំ ដឹងអី ឆ្នាំចេញមក ខុសដដែល ទោះបីជា ខ្ញុំ​បំពេញពាក្យ​ត្រឹមត្រូវក៏ដោយ​។

ស្លាយដ៍សូវ៍​នេះ​ត្រូវការ JavaScript។

សាកលវិទ្យាល័យ អាស៊ី អឺរ៉ុប ពិតជា សាលា ហេងស៊យ មែន !

សំណាងខ្ញុំ​​នៅមានខ្លះដែរ ដោយសារ ខ្ញុំនៅមាន​សញ្ញាបត្រ​​ បរិញ្ញាបត្រច្បាប់មួយ និង​អនុបណ្ឌិតច្បាប់ពីរ​ទៀត កុំអី​​ស៊យ​ក្នុងជីវិត​ ដោយ​សារ សញ្ញាបត្រខុស ​ហ្នឹង​ហ្មង !!!

អ្នក​កាសែត​សហគមន៍នៅជនបទ

នរណាៗ​ក៏អាចធ្វើជា «អ្នកកាសែត» បានដែរ។ នេះជា ឃ្លាមួយ ដែល​ខ្ញុំនៅចាំបានពី សិក្ខាសាលា​អន្តរជាតិ ក្នុង​ចំណោម អ្នកកាសែត​​ជាន់ខ្ពស់ កម្ពុជា ឡាវ មីយ៉ាន់ម៉ា វៀតណាម (Advance Journalist CLMV + CHINA) របស់ មូលនិធិសារព័ត៌មានឯករាជ្យ (Independent Journalism Foundation – IJF) រយៈពេលបីខែ កាលពីឆ្នាំ​២០០៣។ ពាក្យ​នេះ​ បាន​លើកទឹកចិត្ត​ខ្ញុំ​អោយ​បន្ត​ ផ្សព្វផ្សាយ និង​លើកទឹកចិត្ត​ដល់ អ្នកដទៃទៀត ដែល​ចង់​ក្លាយ​ខ្លួនជា អ្នក​កាសែត។ ចុះ អ្នក​វិញ ក្រៅពី មានអាជីពជា អ្នកកាសែត ធ្លាប់​ បាន​លើកទឹកចិត្ត​ដល់ អ្នកកាសែតផ្សេងទៀត យ៉ាងណាខ្លះ ? បើមិន​ជួយ​លើកទឹកចិត្ត​ សូមមេត្តាកុំបង្អាប់ … សម្រាប់​ខ្ញុំ​ បាន​ជួយជ្រោមជ្រែង ផ្តល់​ការលើកទឹកចិត្ត និងបង្ហាញគន្លឹះ រាយការណ៍ព័ត៌មាន សម្រាប់ អ្នកកាសែតក្មេងខ្ចីជាច្រើន តាមរយៈ​​បារខេម វគ្គសិក្សា និង​ជា គ្រូបង្គោល។

កាលពីថ្ងៃទី​១៦ ខែ​មិថុនា ២០១៤ ខ្ញុំ និង​ក្រុម​ការងារ​ពីរនាក់ទៀត​ បាន​ចុះទៅដល់​មូលដ្ឋាន របស់ អ្នកកាសែត​ សហគមន៍ម្នាក់ ឈ្មោះ ប៊ុត កុសល អ្នកកាសែតសហគមន៍ ប្រចាំភូមិ​ពោនកក ឃុំឈើទាល ស្រុកស្វាយជ្រុំ ខេត្ត​ស្វាយរៀង ដើម្បី​ស្វែងយល់ពី ផល​វិបាក របស់​គាត់ ក្នុងការ ផលិត​ព័ត៌មានជា​វិដេអូ ។ អ្នកកាសែតសហគមន៍​​ម្នាក់នេះ ធ្លាប់ទទួលបាននូវ ការបណ្តុះបណ្តាល របៀប​កាត់តវិដេអូ យកព័ត៌មានសហគមន៍​ ពី មជ្ឈមណ្ឌល​​អប់រំ​ច្បាប់​​សម្រាប់​សហគមន៍ តាំងពីខែកញ្ញា ឆ្នាំ២០១៣ ព្រមទាំង ទទួលបាន សម្ភារៈផលិត ដូចជា កុំព្យូទ័រមួយគ្រឿង កាម៉ារ៉ាវិដេអូ​​មួយគ្រឿង និងទូរស័ព្ទ​ Samsung Mini S3 មួយគ្រឿង​ផងដែរ។ អស់រយៈពេល ជិតមួយឆ្នាំ មកហើយ ក្រុមការងារ​​របស់យើង មិនទាន់​បាន​ទទួល ​ព័ត៌មានវិដេអូ ពីគាត់នៅឡើយទេ។

ប៊ុត កុសល អ្នកកាសែតសហគមន៍ ប្រចាំភូមិ​ពោនកក ឃុំឈើទាល ស្រុកស្វាយជ្រុំ ខេត្ត​ស្វាយរៀង និងក្រុមគ្រួសារ

ពេលយើង​ចុះទៅដល់ផ្ទះ​របស់គាត់​ យើងបាន​ដឹង​ហេតុផលមួយចំនួន ដូចជា ផ្ទះរបស់​គាត់​មិនមានភ្លើង​អគ្គិសនី ពេលចង់ប្រើ​កុំព្យូទ័រ​ម្តងៗ​គាត់​ត្រូវទៅ​ប្រើនៅ ហាងកាហ្វេក្នុងភូមិ កុំព្យូទ័ររបស់គាត់​ជានិច្ចកាល ត្រូវសាកថ្មចោលនៅហាងកាហ្វេ​ទម្រាំពេញ អ៊ិនធើណែត​ក្នុងភូមិយឺត សំខាន់​គាត់មិនសូវច្បាស់ពី បច្ចេកទេសកាត់ត ទើបគាត់មិន​ហ៊ានកាត់ខ្លាចខូច…។ ទោះបីជា​យ៉ា​ងណា គាត់ជា មនុស្សម្នាក់​​ដែល​ត្រូវបាន​អ្នកភូមិ​ ទទួល​ស្គាល់ថា ជាអ្នកចេះដឹងខាងបច្ចេកវិជ្ជា និង​អ្នកតស៊ូមតិម្នាក់ផងដែរ។ ពេលអ្នកភូមិ​ មាន​​ទូ​រស័ព្ទស្មាតហ្វូនតែមិនចេះប្រើ​ តែង​ស្ទាក់​សុំជួប​គាត់​ដើម្បីសុំជំនួយ។ គាត់អាចជួយបង្កើត អ៊ីម៉ែល ហ្វែសប៊ុក និងប្រាប់ពីមូលដ្ឋាន​ប្រើប្រាស់​មួយចំនួន​ដល់អ្នកភូមិ។ ក្រៅពី ភាពលេចធ្លោរ ជា អ្នក​កាសែតសហគមន៍ គាត់ធ្លាប់​ទាមទាអោយមានការ អភិរក្សព្រៃឈើទាល នៅក្នុងភូមិ ដែល​នៅ បន្សល់​មកទល់សព្វថ្ងៃ ហើយ​ក៏បុគ្គលិក​សមាគម និស្សិត​គរុកុសល និងមេគ្រួសារម្នាក់ ក្រោមបន្ទុកកូនពីរនាក់ផងដែរ។​

អ្វី​ដែល​ខ្ញុំ​សង្កេតបានពីគាត់ ដំបូង គឺ កុំព្យូទ័រ និងសម្ភារៈ ដែល​យើងបាន​ផ្តល់ជូនគាត់ គាត់​ថែយ៉ាងល្អ ហើយ​មិនហ៊ាន​យកមកប្រើផងព្រោះ​ ខ្លាចខូច។ គាត់កត់ត្រា​ រាល់អ្វីទាំងអស់ដែល​ ខ្ញុំបាន​ប្រាប់គាត់ទាក់ទងនឹង បច្ចេកទេសកាត់ត ព្រោះគាត់ដឹងថា គាត់អាចនឹង​ងាយភ្លេច ពេលមិន​សូវមាន ឳកាសបាន​អនុវត្ត​។ គាត់ថត​បាន​វិដេអូជាច្រើន តែមិនទាន់បានកាត់ គាត់​រវល់ការងារច្រើន​ជា បុគ្គលិកសមាគម ឆ្លៀតឡើង មករៀន​នៅភ្នំពេញ រាល់ថ្ងៃច័ន្ទ ដល់សុក្រ និងជាប់​បន្ទុកគ្រួសារ កូន​តូចផងដែរ។ គាត់ចំណាប់ខ្លាំងក្នុងការសរសេរ​របាយការណ៍ ដូច្នេះ គាត់ អាច សរសេរ​ព័ត៌មាន និងចាប់​ Angle បាន​យ៉ាងល្អ។ ដូច្នេះ ខ្ញុំយល់ថា គាត់អាច​ធ្វើជា អ្នកកាសែតសហគមន៍ និងផលិតវិដេអូបាន​យ៉ាងល្អ​ គ្រាន់​តែគាត់​ត្រូវការ​ពេលវេលា​​អំណោយផល​អោយបាន​ច្រើនបន្តិច រួមទាំងការលៃលកពេលវេលា​សម្រាប់​អោយការកាត់តនេះ។

មជ្ឈមណ្ឌលអប់រំច្បាប់សម្រាប់​សហគមន៍ កំពុងប្រឈមក្នុងការជ្រើសរើស​ អ្នកកាសែតសហគមន៍ បន្ថែម​ មកពីជនបទ ឬខេត្ត​ ដើម្បីផលិត វិដេអូ​សម្រាប់សហគមន៍ បើទោះបីជា យើងមាន​សម្ភារៈ និង​ថវិកា​ពីម្ចាស់ជំនួយ ដើម្បី លើកស្ទួយ ការប្រើប្រាស់​បច្ចេកវិជ្ជានៅសហគមន៍ ព្រោះ អ្នក​នៅ​ស​ហគមន៍ជនបទ ឬខេត្ត​ មិនសូវ​អនុវត្ត​ទាក់ទងនឹង​បច្ចេកវិជ្ជា។

អ្នកកាសែតសហគមន៍​ គឺជា ធនធានដ៏សំខាន់មួយ និង​ហុចផ្លែផ្កាដល់សហគមន៍ច្រើនក្រៃ។ ចាំបាច់ អ្នកកាសែតសហគមន៍ ត្រូវជឿជាក់ថា អ្វីដែលយើងបានធ្វើ គឺជារឿងដ៏ត្រឹមត្រូវ និងគប្បីមួយ ដើម្បីប្រទេសជាតិមួយនេះ។

 

 

តាមរយៈវិដេអូនេះ អ្នកទស្សនា នឹងបាន​ឃើញពី ទិដ្ឋភាព​មូលដ្ឋាន និងបញ្ហាប្រឈមរបស់អ្នកកាសែតសហគមន៍ នៅក្នុងខេត្ត​ស្វាយរៀងម្នាក់។ បន្ទប់កាត់តសម្លេង​វិដេអូរបស់ អ្នកកាសែតសហគមន៍ រូបនេះ គឺជា ហាងកាហ្វេក្នុងភូមិ ដែលអាចផ្គត់ផ្គង់អគ្គីសនី សម្រាប់ប្រើប្រាស់​សម្ភារៈ​កាត់ត។ បើទោះបីជា ហាងកាហ្វេ មានសម្លេងឆ្កែព្រួស ក្មេងយំ មនុស្ស​អូរអរ ញាំបាយ ពិសារកាហ្វេ និងមើលទូរទស្សន៍ តែ ហាងនេះ ជាជម្រើសដ៏ប្រសើរបំផុត ក្នុងពេលនេះ៕