Rate: 9/10
អានចប់ថ្ងៃទី១៦ ខែមីនា ឆ្នាំ២០២៤…
#អស្តង្គតនៃប្រជាជាតិមួយ ភាគ១ (១៦៨ទំព័រ) ពី អ្នកនិពន្ធ #ជុតខែ ជាប្រលោមលោក ចងក្រងរឿងខ្មែរក្រហម ដំបូងបំផុត ដែលធ្វើឱ្យខ្ញុំអានហើយខំទប់សំណើចសឹងមិនបាន ពោលគឺសាច់រឿងកំប្លែងតាំងពីដើមរហូតដល់ចុងបញ្ចប់ បើទោះបីជា មានការបញ្ជាក់ថា «ព្រឹត្តិការណ៍ដ៏អកុសលនេះនៅតាមលងខ្ញុំ[អ្នកនិពន្ធ]ឥតដាច់។
ខុសពីអ្នកនិពន្ធរឿងគុកឥតជញ្ជាំងនៅកម្ពុជាផ្សេងទៀត ដែលរៀបរាប់ពីឈុតឆាកសោកនាដកម្មអំឡុងឆ្នាំ១៩៧៥ ដល់១៩៧៩ ឃើញផ្ទាល់ភ្នែកដោយការផ្គុំតួអក្សរសាមញ្ញ ធ្វើឱ្យអ្នកអានស្ទើរផុតដង្ហើមតាមម្តងៗ ប៉ុន្តែបញ្ញាវ័ន្តខ្មែរចូលនិវត្តន៍ លោក ជុត ខៃ បែរជ្រើសយកតួអង្គប្រកបឆាកមានចរិតកំប្លុកកំប្លែង និងការរៀបរាប់សាច់រឿងដោយប្រើពាក្យពេចន៍ត្រាប់អ្នកស្រុក ដូចជា អាលោក ប៉ៃ អា មី ឪ…ជាដើម ធ្វើឱ្យអ្នកអានផ្ទុះសំណើចទៅវិញ។
សម្រង់ពាក្យពេចន៍៖
[…] អាម្នាក់ គេប្រើអាមួយឱ្យទៅរកទឹកក្នុងផ្ទះ។ អានោះដើរទៅបាត់។ មួយសន្ទុះក៏ចេញមកពីក្នុងផ្ទះវិញនិយាយប្រាប់គ្នីគ្នាវាថា៖ «ខ្ញុំរកមិនឃើញទេមិត្ត ផ្ទះអាចក្រពត្តិឥតមានពាងដាក់ទឹកទេ មិនដឹងជាវាទុកទឹកនៅឯណាទេ»។ ឮដូច្នេះ អាម្នាក់ទៀតគេក៏៏៏ចូលទៅរកទឹកម្តង។ អានោះដើរចុះឡើងក៏ចូលទៅក្នុងបង្គន់។ ស្រាប់តែទៅដល់កន្លែងបត់ជើងធំ អានោះស្រែកយ៉ៃ «ប៉ៃ ! ផ្ទះអាចក្រពត្តិមានអណ្តូងក្នុងផ្ទះ!» រួចហើយស្រាប់តែគេដងទឹកក្នុងប្រឡង់ផឹកក្អឿកៗ។ ផឹកឆ្អែតហើយ គេដងមួយកំប៉ុងទៀតយកទៅឱ្យចិត្តគេឯខាងក្រៅផ្ទះ។ […]
[…] អ្នកភ្នំពេញរាប់រយនាក់អង្គុយចាំស្តាប់ «អង្គការមហាមានគុណ»ព្រុស។ អង្គុយមួយសន្ទុះធំ ទើបឮសូរសំឡេងម៉ូតូមួយសំដៅមករកកន្លែងប្រជុំ។ អាខ្មែរក្រហមពីរនាក់ប្រដាប់ដោយអាវុធ ចុះពីលើម៉ូតូសំដៅទៅដីទួល។ អាម្នាក់បង់កក្រមាសូត្រ ពាក់នាឡិកាដៃ ឡើងព្រុសដូចតទៅ៖ «សូមគោរពអង្គប្រជុំ! សូមគោរពពុកម៉ែ! (ឮពុកម៉ែ ខ្ញុំបះសក់ច្រូង ព្រោះឯងវាមិនដែលបានធ្វើឳម៉ែអាខ្មែរក្រហមសោះ)… អង្គការយើងមហាឆ្លាតវៃណាស់ បន្តិចទៀតយើងយកទឹកមកជំនួសសាំងបានហើយ។… ខ្ញុំហួសចិត្ត ចង់សើចបន្តិច ចង់យំបន្តិច យីអាកូនមីចោរនេះ វាទៅរៀនព្រុសរបៀបហ្នឹងពីសាលាណាមកអ៊ីចេះ។ អានេះវាទុកពួកឯងដូចសត្វស្វា ភ្លើប្រហែលនឹងពួកវាដែរ។ […]
[…] លុះបាយរួមបានប្រហែលមួយខែ ស្រាប់តែបាត់ចានស្លាបព្រាសឹងអស់ពីរាវ។ អាអោ កោះហៅអ្នកថ្មីមកប្រជុំជេរបញ្ចោរពួកយើងអស់ចិត្ត ទើបគេថា ឥឡូវនេះត្រូវដូរកម្មវិធីម្នាក់ៗទទួលខុសត្រូវចានបាយមួយ និងស្លាបព្រាមួយ បើបាត់ត្រូវស៊ីនឹងត្រឡោកដូង។ ក្រោយមក ខ្ញុំបានត្រឡោកដូងធ្វើចាន។ […]
មិនខ្វះទេឈុតកំសត់ ព្រោះតាមរយៈសាច់រឿង អ្នកនិពន្ធ ជារដ្ឋការ ដែលមានវាសនាមិនខុសពីពលរដ្ឋទីក្រុងផ្សេងទៀតដែលត្រូវខ្មែរក្រហមបង្ខំឱ្យចាកចេញពីទីក្រុងភ្នំពេញ (ទាំងគ្រួសារធំ សរុប ២៤នាក់) ចាកចេញពីផ្ទះ ដោយគ្មានគោលដៅ តាមទិសតាខ្មៅ ទៅដល់ព្រែកពោធិ៍។ ថ្ងៃទី១៧ ខែមេសា ឆ្នាំ១៩៧៥ ខ្មែរក្រហម ដេញអ្នកភ្នំពេញឱ្យចេញពីទីក្រុង តែបីទិស គឺផ្លូវទៅតាមតាខ្មៅ ពោធិ៍ចិនតុង និងគីឡូម៉ែត្រលេខ៦។ ពេលរកឃើញគោលដៅ ចង់ទៅរស់នៅស្រុកកំណើតម្តាយក្មេក នាស្រុកកោះសូទិន ខេត្តកំពង់ចាម ដោយថ្មើជើង អ្នកនិពន្ធបាន ពើបប្រទះទេសភាពស្រស់បំព្រងតាមដងផ្លូវ និងព្រឹត្តិការណ៍រន្ធត់ជាច្រើន។ កាលៈទេសៈ ឬជាការរៀបចំរបស់ព្រះ អ្នកនិពន្ធនិងក្រុមគ្រួសារ ប្រពន្ធកូនស្រីទាំងបី ត្រូវជម្លៀសទៅរស់នៅភូមិថ្នល់ ស្រុកដំបែ អស់ជាង ២ឆ្នាំ រហូតដល់មានឱកាសរត់ចេញពីភូមិនោះ ទៅលាក់ខ្លួននៅភូមិចុងសម្រាស ដើម្បីគេចពីការប៉ុនប៉ងសម្លាប់។ ដល់ដើមឆ្នាំ១៩៧៩ លោក ជុត ខៃ សម្រេចចិត្តនាំគ្រួសារចាកចេញពីកម្ពុជាទៅរស់នៅស្រុកបារាំងទល់សព្វថ្ងៃ។
ដ្បិតមេដឹកនាំខ្មែរក្រហម បំផ្លាញសាសនា អំឡុងពេលកាន់អំណាច លោក ជុត ខៃ ប្រដូច មេដឹកនាំខ្មែរក្រហម ទៅនឹង ហ្សុយដាស៍ (Judas) ដែលជា សាវ័កម្នាក់ក្នុងចំណោមសាវ័កទាំង១២របស់ព្រះយេស៊ូ។ ហ្សុយដាស៍៍ ជា សិស្សក្បត់គ្រូ។ លោកប្រដូច ទីក្រុងភ្នំពេញ ឆ្នាំ១៩៧៥ ទៅនឹង ទីក្រុងសូដូម (Sodome) និងហ្គោម័រ (Gomorrhe) ដែលត្រូវ ភ្លើងអាទិទេពកម្ទេចទៅជាផេះ កាលជំនាន់មុនគ្រិស្តសករាជ។ លោក ជុត ខៃ ព្យាយាមប្រាប់អ្នកអានថា ខ្មែរក្រហមមិនអាចបំបែក និងកាន់កាប់ទីក្រុងភ្នំពេញបានទេ បើគ្មានរនុកក្នុង ដ្បិតបរិវារខ្មែរក្រហមល្ងង់ខ្លៅ គ្មានចំណេះដឹង។
ចំណេះដឹងពី #អស្តង្គតនៃប្រជាជាតិមួយ
- ទំព័រ ៦៧៖ ទន្លេមេគង្គ មានន័យថា «មេទឹក» ជាសម្បត្តិធម្មជាតិមួយសំខាន់ណាស់នៃស្រុកខ្មែរដ៏អភ័ព្វយើង។ …
- ទំព័រ ១១៩៖ … អានេះគេហៅ ជំងឺលាក់មិនហ៊ាននិយាយ (Refoulement) តែលាក់យូរៗទៅ វាទៅជាឈឺ ដូចអាមាត្រស្តេចក្បាលទំពែកនោះឯង។ ជំងឺនេះត្រូវអ្នកប្រាជ្ញជាតិអូទ្រីសឈ្មោះ ស៊ិកម៉ង់ ហ្វ្រឺត (Sigmund Freud) រកឃើញនៅសតវត្សរ៍ទី១៩។
ជាចុងក្រោយ ចង់និយាយថា ខ្ញុំកំពុងរង់ចាំអាន ស្នាដៃ «អស្តង្គតនៃប្រជាជាតិមួយ ភាគ២» ជាបន្តទៀត។
សូមណែនាំ ប្រលោមលោកខ្មែរក្រហម ដែលគួរអាន៖
- «កម្ពុជាឆ្នាំសូន្យ» បោះពុម្ពផ្សាយឆ្នាំ១៩៧៧ ជាភាសាបារាំង និងចេញផ្សាយឆ្នាំ២០១០ ជាភាសាខ្មែរ និពន្ធដោយ Francois Ponchaud)
- «ឆ្អឹងមាស» ដំណើរដ៏អស្ចារ្យពីឋាននរកនៅកម្ពុជា ឆ្ពោះទៅជីវិតថ្មី នៅសហរដ្ឋអាមេរិក (បោះពុម្ពផ្សាយ ខែមិថុនា ឆ្នាំ២០០៨ និពន្ធដោយ ស៊ីច័ន្ទ ស៊ីវ)
- «បុប្ផាណា» (បោះពុម្ពផ្សាយឆ្នាំ២០១០ និពន្ធដោយ Elizabeth Becker)
- «ក្តីស្នេហ៍នៅស្រែខ្មោច» (បោះពុម្ពផ្សាយឆ្នាំ២០១៣ ដោយអ្នកនិពន្ធ ទឹង សុខា) [ប្រលោមលោកខ្មែរក្រហម ដែលធ្វើឱ្យខ្ញុំអានហើយស្ទើរគាំងតាមអ្នកនិពន្ធដែរ]
- «សុទ្ធិ កុមារភាពដែលត្រូវគេដកហូត» (បោះពុម្ពផ្សាយ ខែកុម្ភៈ ឆ្នាំ២០១៧ និពន្ធដោយ លោក ហុក សុទ្ធិ)
វាចារ/ឌឺដង