អត្ថបទទាំងស្រុង ពី គេហទំព័រភ្នំពេញប៉ុស្តិ៍

Wednesday, 03 October 2012
អ៊ុំ វណ្ណៈ​

</a

បើ​យោង​តាម​អ្នក​ស្រី ជុំ វណ្ណ​សូដាជីវី​ ជា​គ្រូ​បង្រៀន​សិល្បៈ​បុរាណ​ខ្មែរ​នៅ​សាកល​វិទ្យាល័យ​ភូមិន្ទ​វិចិត្រ​ សិល្បៈ​ បាន​ឲ្យ​ដឹង​ថា ចាប់​តាំង​ពី​បុរាណ​កាល​មក ប្រជាជន​ខ្មែរ​តែងតែ​ផ្ដល់​តម្លៃ​ទៅ​លើ​ព្រហ្មចារី ដោយ​ពួកគេ​ចាត់​ទុក​ជា​ទ្រព្យ​ដ៏​សំខាន់​មួយ​របស់​ស្ដ្រី​ក្រមុំ​។ ស្ដ្រី​ក្រមុំ​ព្រហ្មចារី​ ប្រៀប​បាន​នឹង​ផ្កា​ក្រពុំ​បញ្ចេញ​ក្លិន​ដ៏​ក្រអូប​ភាយ​ ព្រម​ទាំង​ស្រស់​ស្អាត និង​បរិសុទ្ធ​។ ដូច្នេះ ជំនឿ​របស់​បុព្វ​បុរស​ខ្មែរ​បុរាណ​ តែងតែ​ជ្រើស​រើស​យក​ស្ដ្រី​ក្រមុំ​ព្រហ្មចារី​មក​ធ្វើ​ជា​អ្នក​របាំ​ដើម្បី​ រាំ​ថ្វាយ​ដល់​ព្រះ​មហាក្សត្រ​ ឬ​ព្រះ​អាទិទេព​ ពីព្រោះ​ពួក​គេ​អាច​តំណាង​ដល់​នារី​ទេព​អប្សរ​ដែល​ស្អាត​ស្អំ​ទាំង​ចិត្ដ និង​កាយ​។

អ្នក​គ្រូ​ បាន​បញ្ជាក់​ទៀត​ថា​៖ «​តាម​ជំនឿ​ពី​ដើម​មក​ នៅ​ពេល​រៀបចំ​ពិធី​អាពាហ៍​ពិពាហ៍ ​កូន​ប្រុស​យក​ជំនូន​មក​ដល់​ខាង​កូន​ក្រមុំ​ និង​ក្រាប​ក្បាល​ដល់​កន្ទេល​ចំពោះ​មុខ​ឪពុក​ម្ដាយ​ខាង​ស្រី​ដើម្បី​សុំ ស្ដី​ដណ្ដឹង​កូន​ស្រី​មក​ធ្វើ​ជា​ប្រពន្ធ​។ ចំណែក​ឯ​កូន​ស្រី​វិញ ក៏​ក្រាប​ក្បាល​ដល់​កន្ទេល​ដើម្បី​ជា​សក្ខី​ភាព​ក្នុង​ការ​ផ្ដល់​ជូន ព្រហ្មចារី​របស់​ខ្លួន​ជា​ថ្នូរ​នឹង​ជំនូន​ខាង​កូន​ប្រុស​ដែល​បាន​ចំណាយ​ មក​លើ​ខ្លួន​ផង​ដែរ​»។​

លោក​វេជ្ជ​បណ្ឌិត​ លាភ សុវណ្ណ ជា​គ្រូ​ពេទ្យ​ផ្នែក​រោគ​ស្ដ្រី​នៃ​មន្ទីរ​ពេទ្យ​ព្រះ​កុសុមៈ​ បាន​បក​ស្រាយ​ថា​ តាម​ពិត​ទៅ​ ព្រហ្មចារី​របស់​ស្ដ្រី​ អាច​ត្រូវ​បាន​ពិនិត្យ​តាម​ក្បូន​ពេទ្យ​ ពីព្រោះ​វា​ជា​សន្ទះ​តូច​មួយ​ដ៏​ស្ដើង​ដែល​ស្ថិត​នៅ​ចន្លោះ​យោនី​ខាង​ ក្រៅ​និង​ទ្វារ​មាស​ខាង​ក្នុង។ ប្រសិន​បើ​នារី​ម្នាក់​ មិន​ធ្លាប់​រួម​ភេទ​ ឬ​ធ្វើ​ឲ្យ​ប៉ះពាល់​ដល់​ទ្វារ​មាស​ខាង​ក្នុង​ទេ នោះ​សន្ទះ​ព្រហ្មចារី​នឹង​មិន​ដាច់​រហែក​ឡើយ​ ដែល​បញ្ជាក់​ថាស្ដ្រី​ម្នាក់​នោះ​នៅ​ក្រមុំ​បរិសុទ្ធ​ និង​មិន​ទាន់​ឆ្លង​កាត់​ការ​រួម​ភេទ​។

លោក​គ្រូ​ពេទ្យ​បាន​បន្ថែម​ថា៖ ​ «បុរស​ភាគ​ច្រើន​រមែង​ចង់​រួម​ភេទ​ជាមួយ​នារី​ក្រមុំ​ព្រហ្មចារី​ដោយ​ ពួក​គេ​មាន​ហេតុ​ផល​រៀង​ៗ​ខ្លួន​ដែល​ជួន​កាល​អាច​ជា​ជំនឿ​ ឬ​ស្ដ្រី​ព្រហ្មចារី​អាច​ផ្ដល់​នូវ​អារម្មណ៍​ស្រណុក​ស្រួល​ដល់​ខ្លួន​ជាង នារី​មិន​បរិសុទ្ធ​»។​

មិន​ថា​ទំនោរ​ចិត្ដ​របស់​បុរស​ ឬ​គំនាប​ប្រពៃណី​នោះ​ទេ សុទ្ធ​តែ​បាន​ដាក់​បន្ទុក​ខ្លាំង​ទៅ​លើ​ស្ដ្រី​ដែល​ពួកគេ​ត្រូវ​តែ​គ្រប់​ គ្រង​អារម្មណ៍​ផ្លូវ​ភេទ​របស់​ខ្លួន​ដើម្បី​ព្យាយាម​ថែ​រក្សា​ព្រហ្មចារី​ ទុក​ជូន​សា្វមី​។ ម្យ៉ាង​វិញ​ទៀត វា​ក៏​ជា​បន្ទុក​មួយ​ផ្សេង​ទៀត​ដែល​ស្ដ្រី​ត្រូវ​ប្រឈម​យ៉ាង​ធ្ងន់​ធ្ងរ​ នៅ​ពេល​ពួក​គេ​បាត់​បង់​ភាព​បរិសុទ្ធ​មុនថ្ងៃ​រៀប​ការ​។

ដោយ​សារ​តែ បច្ចេក​វិទ្យា​កាន់​តែ​រីក​ចម្រើន​ ព្រហ្ម​ចារី​អាច​ត្រូវ​បាន​គេ​ផលិត​ជា​ថ្មី​ដាក់​លក់​ក្នុង​ទីផ្សារ សម្រាប់​អ្នក​ដែល​ត្រូវ​ការ​។

បច្ចុប្បន្ន​ ការ​ស្ដារ​សន្ទះ​ព្រហ្មចារី​មាន​ការ​វិវត្ដ​ថ្មី​ ហើយ​ចំពោះ​ប្រិយ​មិត្ដ​ដែល​និយម​លេង​ Facebook អាច​ដឹង​ និង​ឃើញ​អំពី​ការ​ឃោសនា​លក់​ផលិតផល​សន្ទះ​ព្រហ្មចារីយ៍​សិប្បនិម្មិត​ និង​សាប៊ូ​សម្រាប់​លាង​បន្ដឹង​ជា​ដើម​។

ជាក់​ស្ដែង​ម្ចាស់​ក្រុមហ៊ុន​ លក់​ផលិត​ផល​នេះកញ្ញា​ លីនដា បាន​ឲ្យ​ដឹង ថា​ផលិតផល​ដំឡើង​សន្ទះ​ព្រហ្មចារីយ៍​ថ្មី​របស់​ក្រុមហ៊ុន​ ត្រូវ​បាន​នាំ​ចូល​ពី​ប្រទេស​ជប៉ុន​ ហើយ​វា​លក់​ដាច់​គួរ​សម​ ដោយសារ​តែ​វា​ជា​ទំនិញ​ថ្មី​ និង​ងាយ​ស្រួល​ប្រើ​។

កញ្ញា​បាន​រៀប​ រាប់​ពី ​អត្ថ​ប្រយោជន៍ និង​វិធី​ប្រើ​ដើម្បី​ទទួល​បាន​ប្រសិទ្ធ​ភាព​ខ្ពស់​ប្រហាក់​ប្រហែល​នឹង​ វត្ថុ​ពិតៗ​ផង​ដែរ។​ គួរ​បញ្ជាក់​ថា​ អតិថិជន​របស់​គាត់ គឺ​ជា​នារី​នៅ​លីវ​ដើម្បី​លាក់​កំបាំង​ពី​ភ្នែក​ស្វាមី​ដែល​ត្រៀម​រៀប​ការ​ នៅ ពេល​ខាង​មុខ​។

លោក ​ជូ យីនស៊ីន រដ្ឋលេខាធិការ​ក្រសួង​សុខាភិបាល​បាន​មាន​ប្រសាសន៍​ថា លោក​ពិត​ជា​ភ្ញាក់ផ្អើល​នៅ​ពេល​ដែល​បាន​ឮ​ពី​វត្តមាន​នៃ​ ទំនិញ​បង្កើត​ព្រហ្មចារី​ឡើង​វិញ​នេះ​ ដែល​វា​បាន​នាំ​ចូល​មក​ដល់​កម្ពុជា ហើយ​លោក​ក៏​មិន​ដែល​ធ្លាប់​បាន​ឮ​ពី​រឿង​នេះ​កាល​ពី​មុន​ឡើយ។ ​ម្យ៉ាង​ទៀត​ លោក​ក៏​បាន​សម្តែង​នូវ​ការ​មិន​ពេញ​ចិត្ត​ថា​ ទំនិញ​បែប​នេះ​មិន​គួរ​ណា​មាន​លក់​នៅ​កម្ពុជា​ទេ ព្រោះ​វា​អាច​ប៉ះ​ពាល់​ដល់​សីលធម៌ និង​វប្បធម៌​ខ្មែរ​យើង​ ហើយ​វា​ក៏​អាច​រាប់​បញ្ចូល​ជា​ការ​កុហក​បោក​ប្រាស់​មួយ​ផង​ដែរ​។​ លោក ​យីន​ស៊ីន​ បន្ថែម​ទៀត​ថា៖ «​ការ​លក់​ផលិត​ផល​បែប​នេះ​គួរ​តែ​មាន​ការ​ស្នើ​សុំ​ពី​ក្រសួង​សុខាភិបាល ដើម្បី​ឲ្យ​ខាង​ក្រសួង​មាន​ការ​វាយ​តម្លៃ​ ថា​តើ​វា​ជា​ផលិត​ផល​ដែល​មាន​ផល​ប៉ះ​ពាល់​សុខ​ភាព​ឬ​យ៉ាង​ណា​»​។

ធម្មតា ​ទេបុរស​តែង​តែ​ប្រាថ្នា​ថា ​ខ្លួន​ជា​អ្នក​ដំបូង​បង្អស់​របស់​ភរិយា​ ហើយ​នារី​ដែល​ធ្លាប់​ជ្រុលជ្រួស​ខ្លួន​​វិញ​ ក៏​មិន​ចង់​ឲ្យ​អនាគត​ស្វាមី​ដឹង​រឿង​នេះ ដែរ​។ បញ្ហា​នេះ​ ពិត​ជា​ពិបាក​រក​វិធី​ដោះស្រាយ​ណាស់​ ប៉ុន្ដែ​ដៃគូ​នីមួយ​ៗ​ គួរ​តែ​ចេះ​យោគ​យល់​គ្នា ចៀស​វាង​ការ​លាក់​លៀម​ដែល​អាច​បង្ក​បញ្ហា​ធំ​ទៅ​ថ្ងៃ​ក្រោយ​។​ ថ្វី​ដ្បិត​តែ​នារី​ខក​ខ្លួន​មួយ​ចំនួន​អាង​មាន​របស់​របរ​​ជំនួយ​យ៉ាង​ណាក៏​ ដោយ ក៏​ពួក​គេ​មិន​ត្រូវ​បណ្ដោយ​ខ្លួន​ឲ្យ​ភ្លើត​ភ្លើន​ដោយ​ភ្លេច​​នូវ​វប្បធម៌​ ដ៏​រុង​រឿង​របស់​ជាតិ​ខ្លួន​​ឡើយ​៕